آئرلینڈ کی دفاعی صلاحیت میں اضافہ: چیلنجز اور مواقع

آر 24 نیوز( ڈبلن)

آئرلینڈ نے حالیہ برسوں میں اپنی دفاعی صلاحیت کو مضبوط بنانے کے لیے نمایاں اقدامات کیے ہیں۔ یورپ کے دیگر ممالک کی طرح، آئرلینڈ بھی دفاعی اخراجات میں اضافہ کر رہا ہے تاکہ مزید فوجی اہلکاروں کی بھرتی اور جدید سازوسامان کی خریداری ممکن ہو سکے۔ بالڈونیل، جہاں آئرش ایئر کور کا مرکز واقع ہے، ان ترقیاتی منصوبوں کا ایک اہم حصہ ہے۔

تاہم، بھرتی اور اہلکاروں کی برقراری میں مشکلات درپیش ہیں۔ گزشتہ 15 سالوں میں دفاعی افواج کی تعداد میں تقریباً 2000 کی کمی واقع ہوئی ہے، اور 2010 سے 2024 کے درمیان تقریباً ہر سال یہ تعداد مزید کم ہوئی۔ 2022 میں تقریباً 900 اہلکاروں نے فورسز کو خیر باد کہا، جو کہ ایک سنگین مسئلہ ہے۔

اس وقت آئرلینڈ کی دفاعی افواج ایک بڑے تاریخی تبدیلی کے مرحلے سے گزر رہی ہیں، جہاں فوجی توسیع کا سب سے بڑا منصوبہ زیرِ عمل ہے۔ حکومت بجٹ میں اضافہ اور نئی حکمت عملیوں کے ذریعے دفاعی نظام کو مضبوط بنانے کی خواہاں ہے، لیکن سوال یہ ہے کہ کیا عوامی دلچسپی اور افرادی قوت بھی اس منصوبے کا ساتھ دے گی؟

دفاعی حکام کا کہنا ہے کہ ملک میں بہترین روزگار اور ایک متحرک، مسابقتی لیبر مارکیٹ کی وجہ سے بھرتی میں مشکلات کا سامنا ہے۔ روایتی سروس ماڈل کے مقابلے میں موجودہ ملازمت کا ماحول زیادہ لچکدار اور عارضی نوعیت کا ہے، جس کی وجہ سے نوجوانوں کا طویل المدتی وابستگی اختیار کرنا مشکل ہو رہا ہے۔

اس کے باوجود، گزشتہ سال 700 افراد کو بھرتی کیا گیا اور اس سال 800 سے زیادہ بھرتیاں کرنے کا ارادہ ہے۔ حکام پرامید ہیں کہ بہتر سہولیات اور پرکشش مواقع کی بنیاد پر مزید لوگوں کو دفاعی افواج میں شامل کیا جا سکتا ہے۔

گزشتہ دنوں بھارتی وزیر خارجہ کے آئرلینڈ دورے اور مستقبل میں دونوں ممالک کے درمیان نظر آنے والے سفارتی تعلقات کو دفاعی ضروریات پوری کرنے کے حوالے سے بھی دیکھا جا رہا ہے جو یقینا پاکستان کے لئے ایک دھچکا ہو گا کیونکہ آئرلینڈ اس وقت

اپنی دفاعی ضروریات پوری کرنے کے لئے نئی شراکت داری کی طرف دیکھ رہا ہے۔

امریکہ کے روس کے ساتھ نرم ہوتے تعلقات اور یورپ کے ساتھ دفاعی، تجارتی اور سفارتی تعلقات میں سرد روی سے یورپ اس وقت اپنے دفاع اور بقاء کے لئے سخت فیصلے لینے پر مجبور ہوتا جا رہا ہے اور یہ بات واضح ہے کہ مستقبل کا یورپ آج کے یورپ سے بہت مختلف ہو گا۔