نادرہ کی نئی موبائل ایپ: آئرلینڈ میں مقیم پاکستانیوں کے لیے بڑی سہولت

(آر 24 نیوز، ڈبلن) – پاکستان کی نیشنل ڈیٹا بیس اینڈ رجسٹریشن اتھارٹی (نادرہ) نے ‘پاک-آئی ڈی’ موبائل ایپ متعارف کرا دی ہے، جس سے دنیا بھر میں مقیم پاکستانی، خاص طور پر آئرلینڈ میں بسنے والے پاکستانی بے شمار فوائد حاصل کر سکتے ہیں۔ اب نائیکوپ (NICOP)، شناختی کارڈ، بی فارم اور دیگر ضروری دستاویزات کے حصول کے لیے سفارتخانوں یا قونصلیٹ کے چکر لگانے کی ضرورت نہیں، بلکہ سب کچھ گھر بیٹھے موبائل فون کے ذریعے ممکن ہوگا۔

آئرلینڈ میں پاکستانی کمیونٹی کو کیا فائدہ ہوگا؟

آئرلینڈ میں ہزاروں پاکستانی مقیم ہیں جو نائیکوپ، پاسپورٹ اور دیگر شناختی دستاویزات کے اجرا اور تجدید کے لیے طویل انتظار اور مشکلات کا سامنا کرتے تھے۔ اس ایپ کے ذریعے:

آن لائن درخواست دینے کی سہولت

گھر بیٹھے فنگر پرنٹس اپلوڈ کرنے کا آسان طریقہ

کسی ایجنٹ یا تھرڈ پارٹی کی ضرورت نہیں

سفارتخانے یا قونصلیٹ کے چکر لگانے کی جھنجھٹ سے نجات

وقت اور پیسے دونوں کی بچت

بی ایم سی اے سے چوہدری عاصم ستار ۔

بیلفاسٹ ملٹی کلچرل ایسوسی ایشن (بی ایم سی اے) کے عاصم ستار، جو گزشتہ کئی سالوں سے آئرلینڈ میں نادرہ سرجری کا انتظام سنبھال رہے ہیں، نے کہا:

“نادرہ کی یہ موبائل ایپ بیرون ملک مقیم پاکستانیوں کے لیے ایک زبردست اقدام ہے۔ خاص طور پر آئرلینڈ میں رہنے والے پاکستانیوں کو اس سے بے حد سہولت ملے گی، جو پہلے شناختی کارڈ اور دیگر دستاویزات کے حصول میں مشکلات کا سامنا کرتے تھے۔ اب تمام عمل ڈیجیٹل ہو گیا ہے، جو وقت کی ضرورت تھی۔”

پی او سی آئرلینڈ کی حفصہ حسین۔

پاکستانی اورسیز کمیونٹی (POC) آئرلینڈ کی حفصہ حسین نے بھی نادرہ کے اس اقدام کو سراہتے ہوئے کہا:

“یہ ایپ واقعی آئرلینڈ میں بسنے والے پاکستانیوں کے لیے ایک بڑی سہولت ہے۔ پہلے لوگوں کو نائیکوپ اور شناختی کارڈ کے لیے قونصلیٹ جانا پڑتا تھا، اب یہ سب کام اپنے موبائل سے آسانی سے ہو سکے گا۔ نادرہ کا یہ اقدام پاکستانی کمیونٹی کی زندگی آسان بنا دے گا۔”

کمیونٹی کے تاثرات

کارک کے رہائشی محمد جنید نے اس ایپ پر خوشی کا اظہار کرتے ہوئے کہا:

“اب ہمیں شناختی کارڈ کے لیے پاکستان جانے یا سفارتخانے کے چکر لگانے کی ضرورت نہیں رہی۔ سب کچھ موبائل پر ممکن ہے۔”

لمرک میں مقیم سارہ خان نے کہا:

“نادرہ کی اس ایپ نے ہماری زندگی آسان کر دی ہے۔ اب ہم اپنے شناختی دستاویزات گھر بیٹھے اپڈیٹ کر سکتے ہیں۔”

یہ ایپ آئرلینڈ میں مقیم پاکستانی کمیونٹی کے لیے ایک بڑی سہولت ہے، جو انہیں وقت، پیسہ اور پریشانیوں سے بچائے گی۔ نادرہ کے اس جدید اقدام کو پاکستانیوں نے بھرپور سراہا ہے، اور امید کی جا رہی ہے کہ مزید خدمات بھی اسی طرح ڈیجیٹل ہوں گی۔