ٹریڈ وار کا خطرہ: آئرلینڈ کی ہاؤسنگ مارکیٹ دباؤ کا شکار؟

ڈبلن (آر24 نیوز) – 8 اپریل 2025

آئرلینڈ کی ہاؤسنگ مارکیٹ کو ایک نئے چیلنج کا سامنا ہے کیونکہ بین الاقوامی سطح پر تجارتی جنگ (Trade War) کے خطرات بڑھتے جا رہے ہیں۔ MyHome.ie اور Bank of Ireland کی جانب سے جاری کردہ تازہ رپورٹ کے مطابق، اگر تجارتی جنگ کا آغاز ہوتا ہے تو اس کے منفی اثرات براہ راست آئرلینڈ کی جائیداد کی مارکیٹ پر پڑ سکتے ہیں۔

رپورٹ میں بتایا گیا ہے کہ آئرلینڈ کی پراپرٹی مارکیٹ کا زیادہ انحصار اُن افراد پر ہے جو بڑی ملٹی نیشنل کمپنیوں میں کام کرتے ہیں۔ یہی وجہ ہے کہ اچانک کسی بھی اقتصادی جھٹکے سے مارکیٹ غیر معمولی طور پر متاثر ہو سکتی ہے۔

2024 کے دوران گھروں کی قیمتوں میں اوسطاً 8.7 فیصد اضافہ دیکھا گیا، جب کہ اسی عرصے میں تنخواہوں میں صرف 5.6 فیصد اضافہ ہوا۔ رپورٹ کے مطابق، اس وقت ایک اوسط مکان کی قیمت تقریباً €404,000 تک پہنچ چکی ہے جو کہ ایک عام سالانہ آمدنی (€51,000) سے آٹھ گنا زیادہ ہے۔

ماہرِ معیشت Conall MacCoille نے خبردار کیا ہے کہ اگر مارکیٹ میں رسد کم اور طلب زیادہ رہی تو قیمتوں میں 5 فیصد اضافے کی پیش گوئی بھی بہت محتاط ہو سکتی ہے۔

یہ صورتحال نہ صرف ہاؤسنگ مارکیٹ بلکہ آئرلینڈ میں مقیم اوورسیز پاکستانی کمیونٹی کے لیے بھی اہم ہے، جو یہاں رہائش، سرمایہ کاری یا فیملی سیٹلمنٹ کی منصوبہ بندی کر رہے ہیں۔