عید کا اعلان جلدی کیوں کیا؟ عوام کا اسلامک سنٹر کے اعلان پر ناراضگی کا اظہار

ڈبلن (آر24 نیوز): آئرلینڈ کے معروف اسلامک سنٹر کی جانب سے اتوار کے روز عید الفطر منانے کے اعلان نے سوشل میڈیا پر ایک نئی بحث چھیڑ دی ہے۔ اس اعلان میں کہا گیا ہے کہ عید کی نمازیں 30 مارچ بروز اتوار صبح 9 بجے اور 11 بجے ادا کی جائیں گی، جب کہ ظہر کے بعد مختلف تفریحی سرگرمیاں بھی منعقد ہوں گی۔

تاہم اس اعلان کے فوراً بعد سوشل میڈیا خصوصاً فیس بک پر عوام کی جانب سے ملے جلے ردِ عمل کا اظہار دیکھنے میں آیا۔ چند صارفین نے اسلامک سنٹر کے فیصلے پر اعتراض کرتے ہوئے کہا کہ یہ اعلان مقررہ روایتی طریقۂ کار اور رویتِ ہلال کے اصولوں سے مطابقت نہیں رکھتا۔ بعض لوگوں نے تبصرہ کیا کہ عید کا اعلان 24 گھنٹے قبل کرنا اور چاند کی رویت کے نتائج کا انتظار نہ کرنا جلد بازی کے مترادف ہے۔ کچھ صارفین نے اسے “سنت کی خلاف ورزی” بھی قرار دیا، جبکہ دیگر نے اسلامک سنٹر سے مطالبہ کیا کہ وہ اپنے اعلان کی وجوہات اور طریقۂ کار واضح کریں۔

دوسری جانب، اسلامک سنٹر کے حمایتی افراد کا کہنا ہے کہ عید کے اعلان میں مقامی اور عالمی فلکیاتی حسابات کو مدِنظر رکھا گیا ہے اور اس عمل میں کسی قسم کی غیر محتاط جلد بازی نہیں کی گئی۔ ان کے مطابق بعض اسلامی مراکز اور ادارے مختلف حسابی طریقوں کو بروئے کار لا کر تاریخ کا تعین کر رہے ہیں، جس کے نتیجے میں عید ایک روز قبل یا بعد میں ہونے کے امکانات پیدا ہوتے ہیں۔

فی الحال اسلامک سنٹر کی جانب سے سوشل میڈیا پر کیے جانے والے اعتراضات پر باضابطہ جواب جاری نہیں کیا گیا۔ البتہ، ادارے کے اندرونی ذرائع کا کہنا ہے کہ وہ اپنی کمیونٹی کے وسیع تر مفاد میں کام کر رہے ہیں۔

واضح رہے کہ عید الفطر کا حتمی اعلان عموماً چاند کی رویت کے بعد کیا جاتا ہے، تاہم فلکیاتی حسابات کی بنیاد پر بعض ادارے قبل از وقت بھی عید کی تاریخ طے کر لیتے ہیں۔ اسی وجہ سے دنیا کے مختلف ممالک اور برادریوں میں عید ایک یا دو دن کے فرق سے منائی جا سکتی ہے۔

آئی سی سی آئی کے اس اعلان کے بعد کیا آپ عید اتوار کو کریں گے یا مزید انتظار کریں گے؟ اپنی رائے دیجئے۔